ພິທີເຊັນສັນຍາ

ການບໍລິການການຂາຍປະກັນໄພຜ່ານທະນາຄານຢ່າງເປັນທາງການ

ລະຫວ່າງ

ທະນາຄານຮ່ວມພັດທະນາ (JDB) ແລະ ບໍລິສັດ ອາລິອັນສ໌ ປະກັນໄພລາວ (AGL)

 

          ຕອນ​ເຊົ້າວັນ​ສຸກຂອງວັນ​ທີ 20 ທັນວາ 2013 ທີ່​ຜ່ານມາ​ນີ້ ທະນາຄານ​ຮ່ວມ​ພັດທະນາ (JDB) ​ໄດ້​ຈັບ​ມື​ລົງ​ນາມ​ເຊັນ​ສັນຍາ ​ກັບ ບໍລິສັດ ອາ​ລິ​ອັນ​ສ໌ ປະກັນ​ໄພ​ລາວ (AGL) ​ເພື່ອ​ພັດທະນາ​ການ​ບໍລິການ ການຂາຍ​ປະກັນ​ໄພ ​ຜ່ານ​ທາງ​ທະນາຄານຢ່າງ​ເປັນ​ທາງ​ການ, ​ໂດຍ​ເປັນ​ກຽດ​ເຂົ້າ​ຮ່ວມ​ຂອງ​ ທ່ານ ​ເອກ​ກະ​ພັນ ພະ​ພິທັກ ປະທານ​ສະພາ​ບໍລິຫານ​ທະນານ​ຄານ​ຮ່ວມ​ພັດທະນາ, ທ່ານ ທອງ​ຈະ​ເລີ​ນ ​ເຄນ​ມິ່ງ​ມົນ​ຄົງ ຜູ້ອຳນວຍການທະນາຄານ​ຮ່ວມ​ພັດທະນາ, ທ່ານ ດຣ ວິວັດ ກິດ​ຕິ​ພົງ​ໂກສົນ​ ປະທານທີ່​ປຶກສາທາງ​ດ້ານ​ເສດຖະກິດທະນາ​ຄານ​ຮ່ວມ​ພັດທະນາ, ທ່ານ ສູນ​ທອນ ຈັນທະ​ວົງ ຮອງ​ຜູ້ອຳນວຍການ​ທະນາຄານ​ຮ່ວມພັດທະນາ, ທ່ານ​ ກີ ​ອາ​ໂປ​ວີ ຜູ້ອຳນວຍການ ບໍລິສັດ ອາ​ລິ​ອັນ​ສ໌ ປະກັນ​ໄພ​ລາວ, ທ່ານ ​ໄພ​ຍະ​ເອກ ທຳ​ມະ​ນາມ ຫົວຫນ້​າພະ​ແນ​ກການ​ຕະຫລາດ & ການ​ຄ້າ ບໍລິສັດ ອາ​ລິ​ອັນ​ສ໌ ປະກັນ​ໄພ​ລາວ ພ້ອມ​ດ້ວຍ​ບັນດາພະນັກງານ​ທັງ​ສອງ​ຝ່າຍ ​ແລະ ສື່​ມວນ​ຊົນ ກໍ່​ໄດ້​ເຂົ້າ​ຮ່ວມ​ເປັນ​ສັກ​ຄີ​ພິຍານ.

          ເຊິ່ງຄູ່​ຮ່ວມ​ທຸລະ​ກິດ​ທັງ​ສອງ​ໄດ້​ເຫັນ​ໂອກາດ​ທາງ​ທຸລະ​ກິດ​ຂອງ​ການ​ປະກັນ​ໄພ​ທີ່​ນັບ​ມື້ນັບ​ມີ​ການ​ຂະຫຍາຍຕົວ​ຕາມ​ສະພາບ​ເສ​ດຖະກິດ ​ແລະ ​ເຫັນ​ຄວາມ​ສຳຄັນ​ໃນ​ເລື່ອງ​ການ​ປະກັນ​ໄພ​ຂອງ​ບັນດາ​ຜູ້​ຊົ​ມ​ໃຊ້ ທີ່​ນັບ​ມື້​ນັບ​ເພີ່ມ​ຂຶ້ນ​ບໍ່​ວ່າ​ຈະ​ເປັນ ອົງ​ກອນ​ຕ່າງໆ, ນັກທຸລະ​ກິດ, ຊາວ​ຄ້າຂາຍ ​ແລະ ປະຊາຊົນ​ທົ່ວ​ໄປ. ດັ່ງ​ນັ້ນ ທັງ​ສອງ​ຄູ່​ຮ່ວມ​ຈຶ່ງ​ໄດ້​ເຊັນ​ສັນຍາ​ຮ່ວມ​ມື​ທາງ​ທຸລະ​ກິດ ​ໂດຍ​ທາງ​ JDB ຈະເປັນ​ຜູ້ນຳ​ສະ​ເຫ​ນີຂາຍ​ປະກັນ​ໄພຂອງ AGL ໃຫ້ແກ່ລູກຄ້າຂອງທະນາຄານໃຫ່ຍຂອງທະນາຄານ, ສາຂາ ແລະ ປ່ອງບໍລິການຕ່າງໆທົ່ວປະເທດ. ຜະລິດຕະພັນທີ່ເປັນຈຸດສຸມທາງທະນາຄານຈະນໍາສະເຫນີປະກອບມີ: ປະກັນໄພທີ່ຢູ່ອາໄສ, ປະກັນໄພທຸລະກິດຂະຫນາດນ້ອຍ, ປະກັນໄພການເດີນທາງ, ປະກັນໄພລົດສຳລັບລູກຄ້າສິນເຊື່ອຊື້ລົດ ແລະ ປະກັນໄພຫລາຍໆປະເພດສຳຫລັບໂຮງຈັກໂຮງງານ, ໂຄງການກໍ່ສ້າງຕ່າງໆ. ນອກນັ້ນ ທັງສອງຝ່າຍຍັງມີແຜນພັດທະນາດ້ານຜະລິດຕະພັນປະກັນໄພ ເພື່ອຕອບສະຫນອງຄວາມສະດວກສະບາຍໃຫ້ແກ່ລູກຄ້າຂອງທະນາຄານຮ່ວມພັດທະນາ ແລະ ບໍລິສັດ ອາລິອັນສ໌ ປະກັນໄພລາວອີກດ້ວຍ.